Кездесу барысында Бозумбаев ҚХР-дағы презентация аясында 20 іс-шара мен кездесу өткізілгенін хабарлады. Олардың қорытындысы бойынша жалпы сомасы 6,4 млрд долларға 30 келісім мен меморандумға қол қойылды.
Алатаудың инвестициялық мүмкіндіктері Шэньчжэнь мэрі Цинь Вэйчжунға, Гонконг әкімшілігінің басшысы Джон Лиге және ірі халықаралық компаниялардың басшылығына таныстырылды.
Су шаруашылығы және энергетикадағы жобалар
Гидротехникалық құрылыстарды жаңғырту, жаңа су қоймалары мен каналдар салу жоспарлары туралы бөлек баяндалды. Энергетикалық және коммуналдық секторларды жаңғырту жөніндегі ұлттық жобаның орындалуы да қаралды.
Биыл тұрғын үй-коммуналдық инфрақұрылымды жаңартуға 1,1 трлн теңгеден астам қаражат бағытталады. Қаржыландыру отандық және халықаралық институттардың қарыз қаражаты есебінен қамтамасыз етіледі. Бұл қаражат үш жыл ішінде коммуналдық желілердің тозуын 40%-ға дейін төмендетуге мүмкіндік береді.
Президенттің тапсырмалары
Тоқаев энергетикалық және коммуналдық инфрақұрылымды жаңғырту жұмыстарына қазақстандық өндірушілерді белсендірек тарту қажеттігін атап өтті. Вегетациялық кезеңнің өтуін, әсіресе оңтүстік өңірлерде бақылауда ұстау тапсырылды.
Мемлекет басшысы Alatau City-дің тұрақты даму моделінің маңыздылығын және жаһандық капитал мен инновацияларды тарту үшін жағдай жасауды атап өтті. Үкіметке қаланың инфрақұрылымына қажетті қаражат бөлу тапсырылды.