Жамбыл облысына еліміздің жетекші медициналық ұйымдарынан акушер-гинекологтар, анестезиолог-реаниматологтар және эпидемиологтар келді. Топ құрамында Ұлттық ана мен бала орталығы UMC, Ұлттық акушерлік, гинекология және перинатология ғылыми орталығы, Ұлттық қоғамдық денсаулық сақтау орталығы қызметкерлері, сондай-ақ Алматы және Шымкент қалаларынан мамандар жұмыс істеді.
Үш күн ішінде сарапшылар өңірдің 14 медициналық ұйымына барды. Олар облыс орталығының стационарларында, қалалық емханаларда, Шу, Талас, Сарысу, Байзақ аудандары мен Тұрар Рысқұлов ауданының орталық аудандық ауруханаларында, сондай-ақ Тараз медициналық колледжінде болды.
Мамандар клиникалық аралаулар өткізді, науқастарға кеңес берді және жергілікті дәрігерлермен бірге күрделі жағдайларды талқылады. Ауыр науқастарға ерекше көңіл бөлінді — олардың еміне еліміздің жетекші реаниматологтары тартылды. Сонымен қатар, сарапшылар жұмыс орындарында мастер-кластар өткізді және акушерлік пен клиникалық эпидемиологиядағы заманауи тәсілдер бойынша семинарлар ұйымдастырды. Оқуға облыстың 140-дан астам медицина қызметкері қатысты.
Жұмыс нәтижелері медициналық ұйымдар басшыларымен өткен кеңесте қорытындыланды. ҚР Денсаулық сақтау министрлігінің ана мен бала денсаулығын қорғау департаментінің директоры Мағрипа Ембергенова және Жамбыл облысы денсаулық сақтау басқармасының басшысы Сержан Назарбек босандыру қызметінің кадрлық әлеуетін нығайтудың қажеттілігін атап өтті. Сондай-ақ олар жүйенің негізгі буыны болып қала беретін облыстық перинаталдық орталықты жаңғыртудың қажеттілігін атап өтті.