Еліміздің көптеген университеттері жыл сайын өз ректорлық гранттарын бөледі. Әрбір ЖОО қанша орын беру, кімге және қандай шарттармен беру керектігін өзі шешеді. Әдетте мұндай гранттар ЕНТ-дан жоғары балл жинаған түлектерге, олимпиада жеңімпаздарына және жекелеген әлеуметтік топтардың өкілдеріне беріледі.
Әкімдіктердің гранттары
Облыстар мен қалалар да жыл сайын қосымша гранттар бөледі. Олар өңірге қажетті мамандарды даярлауға және әлеуметтік жағынан осал санаттарды қолдауға бағытталады. Орын саны, бағдарламалар тізімі және мерзімдерді жергілікті атқарушы органдар айқындайды, ал шешімді әкімдік жанындағы арнайы комиссия қабылдайды.
Жұмыс берушілердің мақсатты гранттары
Кейбір компаниялар ЖОО-мен жасалған келісімдер бойынша студенттердің оқуын қаржыландырады. Мұндай гранттар нақты мамандықтарға беріледі және түлектің кейін осы ұйымда жұмысқа орналасуын көздейді.
Жеке қорлардың гранттары
«Қазақстан халқына» қоғамдық қоры 2026 жылы 350 грант бөледі. Әр грант оқу ақысын төлеуге жылына 1 млн теңгеге дейін қамтиды және он ай бойы ай сайын 60 мың теңге стипендия береді. Құжаттарды 25 жасқа дейінгі ауыл мектептерінің, шағын және моноқалалардың түлектері — жетім балалар, мүгедектігі бар адамдар және мүгедектігі бар баланы тәрбиелеп отырған отбасылардың балалары тапсыра алады. Бағдарлама өтеуді талап етпейді. Құжаттарды қабылдау 1-17 тамыз аралығында серіктес ЖОО-ның қабылдау комиссиялары арқылы өтеді, нәтижелер 11 қыркүйекке дейін жарияланады. Жобаға 44 университет қатысады.
«Серпін» бағдарламасы
Мемлекеттік «Серпін» бағдарламасы бойынша 2026 жылы 2180 грант қарастырылған. Олар Түркістан, Қызылорда, Жамбыл, Алматы облыстары мен Жетісу облысының ауыл мектептерінің түлектеріне арналған. Оқу солтүстік, шығыс және орталық өңірлердің ЖОО-нда педагогикалық, IT, техникалық және ауыл шаруашылығы мамандықтары бойынша өтеді. Қатысушылар мемлекеттік стипендия және жатақхана орнын алады. Қатысу үшін ЕНТ тапсырып, өту балын жинау қажет.
Оқу басталғаннан кейін грант алу мүмкіндігі
Егер абитуриент грантты бірден алмаса, кейін мүмкіндік пайда болуы мүмкін. Бос орындар конкурс нәтижесі бойынша келесі үміткерлерге беріледі. Ақылы негізде оқып жүрген студенттер жекелеген жағдайларда үлгерімі жақсы болса, бос грантқа ауыса алады.